As Lecturas de Pazo Baión estréanse con Arantza Portabales

No Día Mundial do Libro, a autora de «Beleza Vermella» recoméndanos tres obras para poñer en marcha As Lecturas de Pazo Baión. Cada unha delas maridada cun dos nosos albariños

As pequenas cousas encerran praceres xenuínos. Auténticos. Un bo libro e unha copa de albariño, por exemplo, maridan de forma natural. E poden transformar unha mañá gris no máis asollado dos días. É por iso que hoxe, no Día Mundial do Libro, presentámosvos As Lecturas de Pazo Baión.

Unha viaxe compartida na que serán os propios escritores quen recomenden libros para gozar cunha copa de calquera dos nosos albariños. E quen mellor para estrear esta nova sección do noso blogue que Arantza Portabales, unha das escritoras de moda do panorama literario español?

A autora de Deixe a súa mensaxe despois do sinal e de Beleza Vermella volverá á carga o próximo 6 de maio. Farao con A vida secreta de Úrsula Bas (Lumen), a segunda entrega desa singular parella de policías que conforman Abad e Barroso.

Compartir uns minutos con Arantza é sempre un agasallo. Un deses pequenos praceres da vida, lembran? Pola súa empatía, a súa paixón, a súa capacidade de describir este tempo que vivimos, pola súa xenerosidade…

Pazo Baión e Manuel Rivas

A súa primeira recomendación para As Lecturas de Pazo Baión converteuse un cuarto de século despois nun referente da literatura galega contemporánea. Trátase de Que me queres amor?, de Manuel Rivas, unha colección de relatos que recibiu no seu día o Premio Nacional de Narrativa.

«Volvino a ler -explica a escritora galega- a semana pasada e paréceme que é un libro que segue sendo moi actual a pesar de ter xa varias décadas de vida. É fascinante sobre todo a voz narrativa, o manexo do tempo curto é magnífico».

«É un libro –continúa- no que Rivas descobre a súa voz, esa que estará presente en toda a súa obra. Ten imaxes moi evocadoras, moi nostálxicas, esa voz tan lírica que o caracteriza».

Portabales describe esta obra como unha «experiencia sensorial». Unha calidade tan propia do universo do viño. E marida o libro co noso albariño máis identificable, Pazo Baión, pola simbiose que xorde entre dúas creacións moi recoñecibles.

As dúas herdeiras dunha personalidade poderosa.

De vocación tardía, Arantza describe o seu tránsito cara ao mundo da literatura cunha combinación de ironía e filosofía vital. «Empecei a escribir porque me volvín tola [risas]. Unha vai queimando etapas ata que un día dáse conta de que quere algo máis. E a min deume por escribir», relata.

A creadora abonda aínda máis no que supuxo este camiño: «Escribir machacoume a vida porque me fixo dubidar de todas as miñas verdades absolutas [máis risas]. Fíxome descubrir unha paixón. Reneguei de todas as miñas paixóns anteriores e aprendín que hai unha diferenza moi grande entre algo que che gusta e algo que che apaixona», conclúe.

Pazo Baión Gran a Gran e a apaixoante historia de Úrsula Bas

Como segunda suxerencia de As Lecturas de Pazo Baión, Portabales escolle o seu novo libro: A vida secreta de Úrsula Bas. A protagonista da novela é unha escritora que empeza a escribir despois dos 40 (unha chiscadela biográfica?).

E que un bo día aparece nun soto do que non poderá escapar. Abad e Barroso estarán chamados a converterse na súa táboa de salvación.

«É unha novela –explica- que trata das inseguridades que nos atacan a todos a esta idade. Cando somos mozos cremos que temos respostas a todas as preguntas e a esta idade dámonos de conta de que non é así».

«É unha historia de obsesión máis que de amor. Unha novela máis psicolóxica que Beleza Vermella e moi trepidante. Os lectores acompañarán a Abad e a Barroso nesa procura trepidante», adianta.

Para esta maridaxe, a autora decántase por Pazo Baión Gran a Gran. Un viño pasificado moi especial, que xorde dun poderoso camiño creativo protagonizado polo equipo de enólogos da adega. Dunha procura en definitiva como a que orbita ao redor de A vida secreta de Úrsula Bas. «Paréceme que encaixa moi ben».

Definida pola crítica como a nova dama da novela negra en España, hai na obra de Arantza Portabales referencias perennes a algunas das grandes voces do xénero no último cuarto de século ( Mankell, Nesbo…), pero tamén a unha icona como Agatha Christie.

«Beleza Vermella é unha homenaxe clara á súa obra –evoca-. Conservando a miña voz e adaptando a historia ao século XXI. Comparouse e para min é un privilexio. Agatha Christie tiña un patrón de novela e funcionaba sempre. Lograba un desenvolvemento psicolóxico brutal dos seus personaxes».

-E a ti Arantza tamén se che ocorren os mellores crimes fregando a louza como á boa de Agatha?

-Eu frego pouco, así que non. Pero é certo que se me ocorren facendo vida normal: recollendo ás miñas fillas, nas clases de pintura… [risas]

Vides de Fontán e «Rewind» para pechas As Lecturas de Pazo Baión

Como última recomendación para esta primeira entrega de As Lecturas de Pazo Baión, a autora vasco-galega selecciona outra obra dun escritor galego. Rewind, o último traballo do igualmente xenial Juan Tallón.

«É un libro que fala de que pasa cando todo salta polo aire, cando unha desgraza condiciónache a vida». É unha obra, a xuízo da nosa invitada, que «deixa moito pouso, que se che queda dentro un tempo».

E por iso o marida de forma moi natural cunha copa de Pazo Baión Vides de Fontán, co noso albariño con maior personalidade, froito dos seus tres anos de crianza. Un viño cun enorme percorrido, cheo de matices, unha analoxía co libro de Tallón.

A modo de peche de As Lecturas de Pazo Baión, preguntamos á nosa nova amiga polo futuro. E por unha eventual conexión da súa próxima obra co mundo do viño. «A vida secreta de Úrsula Bas visita moito Pontevedra e Cambados, así que xa nos imos movendo», anticipa.

«O mundo do viño ten unha mística moi especial. Fala do noso territorio e é algo que me parece fascinante contar nas miñas historias. Que as novelas se convertan nunha xanela ao mundo».

-E que tal unha trama ambientada en Pazo Baión?

-Estou limitada porque a comisaría está en Santiago, pero nunca se sabe. Quizais no futuro…

Grazas Arantza! Foi un auténtico pracer.

Descubre os nosos viños aquí.

Visítanos no corazón das Rías Baixas.